కాలం ఆగితే....?

సూర్యుడు ఉదయించక మునుపే జీవితంలో మరో రోజు కోసం పోరాడుతూ, గెలుపు కోసం శ్రమిస్తూ, మంచి కోసం ఆరాటపడుతు....

గమ్యం కోసం చేసే పయనంలో మరణమే గమ్యమంటూ మా నుంచి ఓ ప్రాణాన్ని దూరం చేస్తావు..

ఓ కాలమా,ఆగుమా, ఆగి ఒక్కసారి ఆ ప్రాణం కోసం ఎదురు చూసే కళ్ళని చుడుమా!

గెలుపు కోసం నిదురని సైతం మరిచి కష్ట పడితే , జాలే లేకుండా మళ్ళీ మళ్ళీ ఓటమినే పరిచయం చేస్తావు...

ఓ కాలమా, ఆగుమా, ఆగి గెలుపుకై మార్గాన్ని చూపుమా...!

జీవితంపై ఆశలతో సంతోషం కోసం అన్ని సిద్ధం చేస్తే, అసలు మనసే పగిలిపోయే అంత గాయం చేస్తావు..

ఓ కాలమా, ఆగుమా, ఆగి ఒక్కసారి గాయాన్ని మాయం చేయుమా

ఎంతకని ఓర్చుకోను,ఎన్నాళ్లని పోరాడను ఎడారిదారిలో గమ్యం తెలియని బాటసారిలా ఎండమావిలా అందని మధురస్వప్నాల వెంట ఆగని జీవన పయనం జాలిలేని కాలం వడివడిగా పరిగెడుతూనే ఉంది...

ఇన్నాళ్ళూ,ఇన్నేళ్ళూ ఓపికతో పరుగులు పెడుతున్నా అలసిపోయిన మనసు ఇక నావల్ల కాదంటోంది నిన్నందుకోలేని నిస్సహాయతతో నామీద నాకే జాలేస్తోంది  కరిగేకాలం నన్ను చూసి నవ్వుతుంటే కనురెప్పల నీడల్లో జాలువారే కన్నీరు నిశ్శబ్దపురాత్రిలో నాకు తోడౌతోంది అయినా ఈ పయనం ఆగదు, అలసినా తప్పదుసహనాన్ని కూడదీసుకుని, ఆశలపందిళ్ళు వేసుకునిమళ్ళీ నీతో ప్రయాణం మొదలుపెడతానుకాలమా, నాకోసం ఓ నిమిషం ఆగవూ  ......